六日五夜 「處女星號」越南.三亞郵輪之旅 – 美食活動篇@Flyday 小編

 

黎到麗星船上嘅餐飲同活動篇喇!而小編當晚上船就係睇台灣著名女歌手黃小琥!佢首《沒那麼簡單》真係唱到識背呀!「相愛沒有那麼容易 每個人有他的脾氣~~過了愛作夢的年紀 轟轟烈烈不如平靜~~」之後佢仲表演埋《熱情的沙漠》、《不只是朋友》等多首名曲,《藍天》一曲更係清唱添!

 

 

正如佢所講 every time!every where! every tempo!咩類型歌曲都難唔到佢架!現場觀眾更一齊合唱,氣氛十足!

另外麗星每晚都有不同類型嘅表演節目,包括由麗星員工所表演嘅 crew show,星際尋夢勁舞 show 等。其中仲有魔術 show 由歐洲頂級魔術師 Vincent Vignaud 表演,音樂劇 Memory Lane 時光隧道及1001 Nights 一千零一夜,但因為今次時間配合唔到就無緣觀賞喇。

 

 

小編最喜歡佢地嘅裝扮跟表演,哈哈!

 

 

呢個就係麗星員工表演嘅 crew show!佢地真係好多才多藝架!

 

 

仲有星際尋夢勁舞 SHOW,一班來自俄羅斯舞蹈員嘅勁歌熱舞!

當然大家最有興趣就係船上有咩好食推介啦!麗星郵輪處女星號由一月至二月尾期間,每星期都有不同嘅環球美食主題,小編呢次上船仲可以試盡東瀛美饌同冬日之選入面菜單美食添!另外仲有義大利,韓國、越南等美食主題架!今次分別去了Samurai Restaurant 侍軍日本餐廳、Noble House 皇府大酒樓、Blue Lagoon 藍湖小吃及 Palazzo 帕拉素意大利餐廳等餐廳。等我逐一介紹各間餐廳推介啦!

以上餐廳都需另外收費,而船上分別有十二樓地中海自助餐廳國際自助餐,六樓雲頂宮同滿漢軒提供免費嘅早午晚餐!提提大家,其他船上付費餐廳係用房卡紀錄消費呀!

 

 

有一晚十二樓國際自助餐移到室外舉行 BBQ party,人很多非常有氣氛!

今次旅程小編用左 DC Canon G7X 去影相,光圈可以去到 1.8F-2.8F,可以較大光圈影食物,影風景效果也不錯!有時去旅行唔想帶部單反機咁重,一部小巧相機就非常方便啦!

宜家等小編先介紹 Samurai Restaurant 侍軍日本餐廳,大廚會係房中用鐵板燒即場烤製,我地更可以一邊食一邊睇大廚表演廚藝!套餐包括有刺身、海鮮類如大蝦、鱈魚、魷魚、仲有美國安格斯牛同澳洲穀飼牛扒等等。

 

 

我地仲試咗以下美食主題菜色,有阿拉斯加蟹腳烏冬麵、日式雜錦煲、波士頓龍蝦味噌湯配蒜茸炒飯、香炒甜姜汁豬柳及天婦羅香蕉拌綠茶冰淇淋。

 

 

日式雜錦煲。

 

 

呢個波士頓龍蝦味噌湯真係唔錯,味噌湯唔會死咸同埋龍蝦肉都好彈牙!

另一晚我地就去左 Noble House 皇府大酒樓食中菜、菜色包括黑松露蜜豆煎斑球、北京片皮鴨兩吃、椒鹽黃金鮮魷、脆香蒜片炒美國安格斯牛粒、川式烤鰻魚、炸子雞、阿拉斯加蟹腳乾燒伊麵、XO 醬帶子菜粒炒飯、甜品仲有芒果椰香黑糯米飯添!

 

 

山珍海味佛跳墻用料十足!

 

 

北京片皮鴨兩吃。

 

 

呢個川式烤鰻魚都好好食呀!

我地仲去咗位於七樓廿四小時營業嘅 Blue Lagoon 藍湖小吃食宵夜。原來今次美食主題係各款煲仔飯呀!有雜錦臘味煲仔飯、鍋蛋牛肉煲仔飯、臘腸排骨煲仔飯、咸魚雞粒煲仔飯等。小編食野從來都唔自私嘅,所以就 order 咗招牌菜海南雞飯、馬來西亞肉骨茶、檳城蝦麵及馬來雜錦沙嗲串等同朋友一齊 share 食啦!

 

 

招牌海南雞飯。

 

 

 

鹵水拼盤及馬來西亞肉骨茶都很不錯!

仲有推介 Palazzo 帕拉素意大利餐廳,食物水準高!餐廳環境寧靜舒適,好岩同伴侶黎浪漫下架!只要二百幾蚊就有前菜、湯、主菜及甜品

 

 

 

 

以呢個價錢食到四個菜式真係超值!

食左咁多餐正餐,為食嘅小編心癢癢好想食甜品呀!原來港人所熟悉嘅 Lab Made 分子雪糕專門店登陸咗處女星號!總共有四種味道,分別有朱古力,士多啤梨、香草及菠蘿乳酪味。小編就覺得應該要研究出一款處女星號獨有口味,唔知道味道會唔會充滿海洋味呢?

 

 

呢間 Lab Made 位於十二樓游泳池旁。

 

 

最鍾意食菠蘿乳酪味,酸酸甜甜好開胃架!

呢六日旅程中,每日都觀賞各項表演及試盡船上美食,身心都好滿足呀!麗星郵輪船上嘅活動真係一啲都不沉悶,小編仲好似肥左十磅先返香港添!

「處女星號」喺一月八日推出首個廣州南沙港三天兩晚香港周末航次,仲為咗令旅客盡興而歸,於一月至三月期間,逢周六晚共有兩場表演,座位先到先得!麗星特別邀請中港台知名歌手登船演出,免費入場欣賞經典好歌!除咗黃小琥外,之後逢周六仲有其他歌手如任賢齊、許志安、光良、謝天華、蘇永康及蕭正楠陸續登場架!

如對以上郵輪之旅有興趣,可以上番麗星郵輪官網了解詳情: 
www.starcruises.com

 

Flyday 小編
本文已獲作者投稿授權刊登,關於本網站內之產品、圖片及文字內容的版權全歸作者所有。